ක්‍රිස්තුස් වහන්සේ නැවත පැමිණීමට පෙර, මුළු ලෝකයටම ළඟා වන රාජ්‍යයේ මෙම ශුභාරංචිය ප්‍රකාශ කිරීමක් සිදුවනු ඇත (මතෙව් 24:14).

රාජ්‍යයේ ශුභාරංචිය යනු කුමක්ද? රෝම 14:17 පැහැදිලිවම උගන්වන්නේ එය ශුද්ධාත්මයාණන් තුළ ධර්මිෂ්ඨකම, ශුද්ධාත්මයාණන් තුළ සමාදානය සහ ශුද්ධාත්මය තුළ ප්‍රීතිය පිළිබඳ ශුභාරංචිය බවයි. එය ප්‍රකාශ කරන්නේ ඉතා සුළු පිරිසකි. බොහෝ මිනිසුන් පව් සමාව පමණක් ප්‍රකාශ කරයි, එය ඉතා හොඳ පළමු පියවරකි.

" ක්‍රිස්තුස් වහන්සේ මිය ගොස් නැවත නැඟිට තම රුධිරය පියාණන් වහන්සේ ඉදිරියෙහි ඉදිරිපත් කිරීමට සිදු ව තිබුණි. මිනිසුන්ගේ හදවත් පිරිසිදු කළ හැක්කේ ඉන් පසුව පමණි "

මට එය කෝප්පයක් පිරිසිදු කිරීම වැනිය. මගේ චූටි පුතා මගේ ළඟට ඇවිත් "තාත්තා මට කිරි වීදුරුවක් දෙන්න පුළුවන්ද" කියා මට කිළුටු කෝප්පයක් (අපේ හදවතේ පින්තූරයක්) දුන්නොත්, මම මුලින්ම කරන්නේ කෝප්පය පිරිසිදු කිරීමයි. මම ඒ අපිරිසිදු කෝප්පයට කිරි වත් නොකරමි. මම ඒ කෝප්පය අරගෙන හොඳට පිරිසිදු කරනවා. නමුත් එසේ නම්, එහි අරමුණ කුමක්ද? මම ඔහුට හිස් කෝප්පයක් නොදෙමි! මම එය කිරිවලින් පුරවා ඔහුට දෙමි.

ඒ හා සමානව, අප ක්‍රිස්තුස් වහන්සේ වෙතට පැමිණි විට, උන්වහන්සේ මුලින්ම කරන්නේ කෝප්පයේ ඇතුළත පිරිසිදු කිරීම වැනි අපගේ හදවත් පිරිසිදු කිරීමයි. නමුත් උන්වහන්සේ එය එලෙසම තබයිද? නැත! උන්වහන්සේ එය ශුද්ධාත්මයාණන් කරණකොටගෙන දෙවියන්වහන්සේගේ ධර්මිෂ්ඨකමෙන්ද, දෙවියන්වහන්සේගේ සමාදානයෙන්ද, දෙවියන්වහන්සේගේ ප්‍රීතියෙන්ද පුරවන සේක. මෙය ශුභාරංචියයි. ක්‍රිස්තුස් වහන්සේ හදවත පිරිසිදු කර කුසලානය පිරිසිදු කරන බවට යන සත්‍යය පමණක් අපි ඉදිරිපත් කරන්නේ නම්, අපි මිනිසුන්ට හිස් කෝප්පයක් පිරිනමන්නෙමු, ඒ නිසා බොහෝ කිතුනුවන් පිපාසයෙන් සිටිති. ඔවුන් සෑහීමකට පත් නොවන්නේ ඔවුන්ගේ කෝප්පය සැබවින්ම පිරිසිදු විය හැකි නමුත් එය හිස්ව රැගෙන යන බැවිනි. "පුතා, ඔබ මට කිළුටු කෝප්පයක් දුන්නා, මෙන්න එය පිරිසිදුයි" කියා මගේ පුතාට පිරිසිදු හිස් කෝප්පයක් ලබා දීමෙන් ඇති ප්‍රයෝජනය කුමක්ද? දෙවියන් වහන්සේ අපට ලබා දෙන්නේ එපමණ නම්, එය බලාපොරොත්තු සුන්වීමක් බවට පත් වනු ඇත. මගේ පුතා පවසනුයේ, "අනේ තාත්තේ, මට ඕනාවුනේ කිරි ටිකක් " කියාය.

ඔබ ධර්මිෂ්ඨකමට සාගින්නෙන් හා පිපාසයෙන් සිටිනවාද? ගැටළුව නම්, බොහෝ කිතුනුවන් ධර්මිෂ්ඨකම සඳහා කුසගින්නෙන් සහ පිපාසයෙන් නොසිටීමය, ඔවුන් පිරිසිදු හිස් කෝප්පයක් රැගෙන යන්නේ එබැවිනි.

පැරණි ගිවිසුමේ සහ නව ගිවිසුමේ වෙනස මෙසේ විස්තර කළ හැකිය: පැරණි ගිවිසුමේ ඇදහිලිවන්තයෙකුට දුන් පරිදි, දෙවියන් වහන්සේගේ රාජ්‍යය පොළොවට ගෙන එන ශුද්ධාත්මයාණන්ගේ දීමනාව මේසයක් මත මුණින් අතට තබා ඇති කෝප්පයක් වැනිය. ඔබ කෝප්පයට ජෝගුවකින් වතුර වත් කරන්න. මෙය ශුද්ධාත්මයාණන්ගේ පිටාර ගැලීමේ පින්තූරයයි. පරණ ගිවිසුමේ කාලයේ එය එසේ විය. ජලය ගලා ගියේය; ශුද්ධාත්මයාණන් මිනිසුන් මත සිටි අතර ඔවුන් වටා ගලා ගොස් දහස් ගණනක් සහ මිලියන ගණනක් ජනයාට ආශීර්වාද කළේය. දෙවියන් වහන්සේගේ අභිෂේක ලත් සේවකයෙකු වූ මෝසෙස් විසින් මෙහෙයවන ලද මිලියන දෙකක ජනතාවක් වනාන්තරයේ සිටියහ. නමුත් මෝසෙස්ගේ හදවත අපිරිසිදු විය. ඔහුට කෝපය ජය ගත නොහැකි විය. ඔහුගේ කෝපය නොතකා, සමූහයාට ආශීර්වාද කිරීම සඳහා ඔහුගෙන් ආශීර්වාදය ගලා ආවේය.

පරණ ගිවිසුමේ දාවිත්, සැම්සන්, ගිඩියොන් සහ තවත් බොහෝ අය සමඟ එය එසේ විය. දෙවියන් වහන්සේගේ ආත්මය ඔවුන් කෙරෙහි විය. තම මවගේ ගර්භාෂයේ සිට දෙවියන් වහන්සේගේ ආත්මය ඔහු කෙරෙහි තිබූ ශ්‍රේෂ්ඨ යොහන් බව්තීස්තට පවා තමාව සිරගත කරන විට ක්‍රිස්තුස් වහන්සේ ගැන සැකයක් ඇති විය. ස්වර්ගයෙන් හඬක් ඇසුණත් යේසුස් වහන්සේ ඇත්තටම ගැලවුම්කරුද කියා ඔහු ප්‍රශ්න කළේය. ඔහුගේ කෝප්පයේ ඇතුළත ඇදහිල්ලෙන් පිරී නොතිබූ නිසා ඔහුට අවිශ්වාසයක් ඇති විය.

නමුත් පෙන්තකොස්ත දවසේදී, ස්වාමින් වහන්සේ මෙම හදවත නමැති කුසලානය හරි පැත්තට හරවා, කුසලානය තුළට ශුද්ධාත්මයාණන් වත් කළ සේක. එවිට එය පරණ ගිවිසුමේ මෙන් මිනිසුන්ට උතුරා ගොස් ආශීර්වාද කරනවා පමණක් නොව, නව ගිවිසුමේ ඊට වඩා බොහෝ සෙයින් වැඩි විය. එය අභ්‍යන්තරයේ සිට වනු ඇත. එය අප තුළ සිට ගලා එන දෙවියන් වහන්සේගේ රාජ්‍යය වේ. පෙන්තකොස්ත දවසේදී පැමිණෙන බව යේසුස් වහන්සේ අනාවැකි කීවේ මෙයයි. ජෙරුසලමේ මහා මංගල්‍යයේ අවසාන දිනයේදී යේසුස් වහන්සේ පැවසුවේ, "ශුද්ධ ලියවිල්ලේ සඳහන් පරිදි, 'ඔහුගේ අභ්‍යන්තරයෙන් ජීවමාන ජල ගංගා ගලා එන්නේය' (යොහන් 7:38). පෙන්තකොස්ත දවසට පෙර එය සිදුවන්නට නොහැකිවුණි. යොහන් 7:39 හි පවසන්නේ, "මෙය උන්වහන්සේව විශ්වාස කළ අයට ලැබීමට නියමිතව සිටි ශුද්ධාත්මයාණන් ගැන සඳහන් කරමිනි; මක්නිසාද ශුද්ධාත්මයාණන් තවම ලබා දී නොතිබුණි," එනම් මේ ආකාරයෙන් ලබා දී නොතිබුණි. මක්නිසාද යේසුස් වහන්සේ තවමත් මහිමයට පත් වී නොසිටි සේක.

ක්‍රිස්තුස් වහන්සේ මිය ගොස් නැවත නැඟිට තම රුධිරය පියාණන් වහන්සේ ඉදිරියෙහි ඉදිරිපත් කිරීමට සිදු ව තිබුණි. මිනිසුන්ගේ හදවත් පිරිසිදු කළ හැක්කේ ඉන් පසුව පමණි. ගොනුන්ගේ සහ එළුවන්ගේ රුධිරයට කිසිදා මිනිසුන්ගේ හදවත් පවිත්‍ර කිරීමට නොහැකි විය, ඒ නිසා දෙවියන් වහන්සේට ශුද්ධාත්මයාණන් මිනිසුන් තුළ තැබීමට නොහැකි විය. පැරණි ගිවිසුමේ කාලයේ මිනිසුන් තුළට දෙවියන් වහන්සේගේ රාජ්‍යය පැමිණිය නොහැකි විය. නමුත් දැන් ක්‍රිස්තුස්වහන්සේ උන්වහන්සේගේ ලේ වගුරුවා පියාණන් වහන්සේ වෙතට නැඟී ඇති බැවින්, අපගේ සෑම පාපයක්ම ස්වාමින් වහන්සේට පාපොච්චාරණය කළහොත් ඒවා පවිත්‍ර කරනු ලැබිය හැක.

එබැවින් දෙවියන් වහන්සේ කුසලානය හරි පැත්තට හරවා ක්‍රිස්තුස් වහන්සේගේ රුධිරයෙන් අපව පවිත්‍ර කර ප්‍රථමයෙන් ශුද්ධාත්මය අප තුළ වගුරුවා දෙවියන් වහන්සේගේ කැමැත්ත කිරීමට උන්වහන්සේ අපව ශක්තිමත් කරණසේක. එවිට, උන්වහන්සේගේ ජීවිතය වචනවලින් සහ ක්‍රියාවෙන් අපෙන් ගලා යයි, ඉන් පසුව අප විසින්ම දෙවියන්වහන්සේගේ කැමැත්ත කළාක් මෙන් අන්‍යයන්වද, දෙවියන්වහන්සේගේ කැමැත්ත කිරීමට යොමු කිරීමට අපට හැකිවන්නේය.

ශුද්ධාත්මයාණන් අපගේ අභ්‍යන්තරයෙන් ගලා එයි. ආත්මය අපගේ අභ්‍යන්තරයෙන් ගලා නොඑන්නේ නම්, එය පැරණි ගිවිසුම් ආකාරයේ දේවසේවයකි.