"මාව අනුගමනය කරන්න" කියලා අලුත් ගිවිසුමේ පැවසූ දෙදෙනෙක් සිටිති. පරණ ගිවිසුමේ කිසිම අනාගතවක්තෘවරයෙකුට කවදාවත් මාව අනුගමනය කරන්න කියලා කියන්න පුළුවන්වුනේ නැහැ. ඔවුන්ගේ ජීවිතය අනුගමනය කළ හැකිවූ ආදර්ශයක් නෙවෙයි. යෙසායා වත් හෝ මෝසෙස් වත් නෙවෙයි; කවුරුත් හිටියේ නැහැ. ඔවුන්ට ප්‍රකාශ කළ හැකි වුණේ "දෙවියන් වහන්සේ මා තුළින් කියන දේ අහන්න. මේවා දෙවියන් වහන්සේගේ වචන" කියලා විතරයි. නමුත් ඔවුන්ගෙන් එක් කෙනෙකුටවත් "මගේ ආදර්ශය අනුගමනය කරන්න" කියලා කියන්න බැරි වුණා. මෝසෙස් තම බිරිඳ සමඟ රණ්ඩු වී තම පුතාව චර්මච්ඡේදනය නොකිරීමෙන් දෙවියන් වහන්සේට අකීකරු වුණා. ඔවුන් සියලු දෙනාම ඔවුන්ගේ ජීවිතයේ හොඳ ආදර්ශ නොවූවත්, ඔවුන්ට දෙවියන් වහන්සේගේ වචනය නිවැරදිව ප්‍රකාශ කර "ස්වාමීන් වහන්සේ මෙසේ වදාළ සේක" කියලා කියන්න පුළුවන්වුනා. නමුත් අලුත් ගිවිසුමේ අපි "ස්වාමීන් වහන්සේ මෙසේ වදාළ සේක" කියලා විතරක් කියන්නෙ නැහැ. අපි "එන්න, දෙවියන් වහන්සේ කියන දේ අහන්න" කියලා විතරක් කියන්නෙ නැහැ.

අලුත් ගිවිසුමේ අපි පවසන්නේ, "එන්න, දෙවියන් වහන්සේ කළ දේ ඇවිත් බලන්න" කියලා, ඒක පරණ ගිවිසුමේ අනාගතවක්තෘවරුන් කියන "එන්න, දෙවියන් වහන්සේ කියන දේ අහන්න" කියන එකට වඩා වෙනස්. අලුත් ගිවිසුමේ අනාගතවක්තෘවරයා කියනවා, "එන්න, දෙවියන් වහන්සේ මගේ ජීවිතේ කරපු දේ බලන්න. එන්න, දෙවියන් වහන්සේ මගේ පවුල ඇතුළේ කරපු දේ බලන්න. එන්න, දෙවියන් වහන්සේ මා ඇතුළේ කරපු දේ බලන්න. දැන් මම කැමතියි යේසුස් වහන්සේට ඔබේ ජීවිතේත් ඒ දේම කරන්න පුළුවන් වෙන විදිහට අණ කළ දේට කීකරු වීම ගැන ඔබට උගන්වන්නට. මාව අනුගමනය කරන්න."

"මාව අනුගමනය කරන්න" කියා බයිබලයේ මුලින්ම පැවසූ පුද්ගලයා යේසුස් වහන්සේය. ඉන්පසු අපි පාවුල් "මා ක්‍රිස්තුස් වහන්සේ අනුගමනය කරන ආකාරයටම මා අනුගමනය කරන්න" යැයි පැවසීම (1 කොරින්ති 11:1) හී කියවන්නෙමු. ඔහු පිලිප්පි 3:17 හි තවදුරටත් මෙසේ පවසයි, "සහෝදරවරුනි, මාගේ ආදර්ශය අනුගමනය කරන්න. මගේ ආදර්ශය පමණක් නොව, මා මෙන් ඇවිදින අන් අයව නිරීක්ෂණය කරන්න. මම ක්‍රිස්තුස් වහන්සේ අනුගමනය කරන නිසා ඔබට ඔවුන්ගේ ආදර්ශයද අනුගමනය කළ හැකිය. "ක්‍රිස්තුස් වහන්සේ මීටර් 10,000 ක් උස කන්දක් මුදුනට නැඟුණු පුද්ගලයා හා සමානයි. ඔහු මුදුනට ළඟා වී ඇති අතර, අපි අනුගමනය කරමින් සිටින්නෙමු. පාවුල් බොහෝ විට අපට වඩා ඉදිරියෙන් සිටී. සමහර විට ඔහු මීටර් 3,000-4,000 ක් ඉහළට ගොස් ඇත. ඔහු පිටුපස සිටින අයට, "මාව අනුගමනය කරන්න" යැයි පවසයි. සමහර විට මම මීටර් 500 ක් දක්වා පමණක් ගොස් ඇත. කන්දේ තවත් පහළින් සිටින අයට "මාව අනුගමනය කරන්න" යැයි මට පැවසිය හැකිය. මට ඉදිරියෙන් සිටින, ක්‍රිස්තුස් වහන්සේව කඳු මුදුන දක්වා අනුගමනය කරන අනෙක් අයගේ ආදර්ශය අනුගමනය කළ හැකිය. කඳු මුදුන ක්‍රිස්තුස් වහන්සේට සම්පූර්ණයෙන්ම සමාන ය. ඒ ඉලක්කයයි. ඉලක්කය වන්නේ ලෝකයේ සිටින සියලුම රෝගීන් සුව කිරීම නොව, අපගේ ජීවිතයේ යේසුස් ක්‍රිස්තුස් වහන්සේ හා සමාන වීමයි, එවිට එම ජීවිතයෙන් දේවසේවය උතුරා යනු ඇත.

අපි මෙය තේරුම් ගත යුතුයි. යේසුස් වහන්සේ අපට අණ කළේ නැහැ උන්වහන්සේ කළ සේවයම කරන ලෙසට මිනිසුන්ට පවසන්න කියලා. පාවුල්ගේ දේවසේවය ගැන කතා කරනවා නම්, "මාව අනුගමනය කරන්න" කියලා ඔහු කිව්වම අපට ඔහුව අනුගමනය කරන්න බැහැ. ඔහු අපට කියන්නේ අපොස්තුළුවරුන් වෙන්න කියලා නෙවෙයි. සෑම කෙනෙකුටම ප්‍රේරිතයෙකු විය හැක්කේ කෙසේද? සෑම කෙනෙකුටම පාවුල් මෙන් අනාගතවක්තෘවරයෙකු හෝ එවැන්ජලිස්තවරයෙකු විය හැක්කේ කෙසේද? ඔහු පැවසුවේ, "මගේ ජීවිතය තුල මාව අනුගමනය කරන්න. මම ක්‍රිස්තුස් වහන්සේව අනුකරණය කරන ආකාරයට මාව අනුකරණය කරන්න." සියලුම රෝගීන් සුව කිරීම, ජලය මත ඇවිදීම හෝ රොටි පහකින් 5,000 කට පෝෂණය කිරීම යන ක්‍රිස්තුස් වහන්සේගේ දේවසේවය අනුකරණය කිරීමට ප්‍රේරිත පාවුල්ට පවා නොහැකි විය. පාවුල් තමා කුසගින්නේ සිටින බව පැවසූ අවස්ථා තිබුණි (2 කොරින්ති 11:27). ඔහුට අවශ්‍යතාවයක් ඇති වූ විට, ඔහු සීතලෙන් වෙව්ලමින් තිමෝතිගෙන් තමාට බ්ලැන්කට්ටුවක් ගෙන එන ලෙස ඉල්ලා සිටියේය (2 තිමෝති 4:13). මුල් කිතුනුවන් බොහෝ ආකාරවලින් දුක් වින්දෝය. ඔවුන්ව සිංහයන්ට විසි කළ විට ඔවුන් ආරක්ෂා නොවූ නමුත් ඔවුන්, තමන් වහන්සේව කුරුසියේ ඇණ ගසනු ලැබූ විට ආරක්ෂාව ප්‍රතික්ෂේප කළාවූ යේසුස් වහන්සේව අනුගමනය කලසේක. අප අනුගමනය කළ යුත්තේ උන්වහන්සේගේ ජීවිතයයි. යේසුස් වහන්සේගේ දේවසේවය අපට අනුගමනය කළ නොහැක.

මේ සඳහා පැහැදිලිම උදාහරණය නම්, උන්වහන්සේගේ දේවසේවයට ලෝකයේ පාප වෙනුවෙන් මිය යාමද ඇතුළත් වීමයි. අපට එම දේවසේවය අනුගමනය කිරීමට කොහෙත්ම හැකියාවක් තිබේද? අපට එය කළ නොහැක. එබැවින්, අපි අනුගමනය කරන්නේ උන්වහන්සේගේ ජීවිතය තුළවූ දේය. යේසුස් වහන්සේගේ ජීවිතය සහ උන්වහන්සේගේ දේවසේවය අතර වෙනස අප විසින් වෙන්කර හඳුනාගත යුතුය. එක් වාක්‍යයකින් යේසුස් වහන්සේට පැවසිය හැක්කේ උන්වහන්සේගේ ජීවිතයේදී සහ උන්වහන්සේගේ දේවසේවය යන දෙකෙහිම උන්වහන්සේ තම පියාණන්ගේ කැමැත්ත කළ බවයි. අපගේ ජීවිතවලදී සහ අපගේ දේවසේවය තුළද අපට දෙවියන් වහන්සේගේ කැමැත්ත කළ හැකිය. අපගේ ජීවිතයේ, එය හරියටම යේසුස් වහන්සේගේ ආදර්ශය අනුගමනය කිරීමයි. පාවුල් කළේ එයයි. අපගේ දේවසේවයේදී, අපට දී ඇති ක්‍රිස්තුස් වහන්සේගේ ශරීරය තුළ එම විශේෂිත කාර්යය ඉටු කිරීමයි. යේසුස් වහන්සේගේ ජීවිතය සහ යේසුස් වහන්සේගේ දේවසේවය අතර මෙම වෙනස අප තේරුම් ගන්නේ නම්, අප රැවටීමෙන් ආරක්ෂා වී ඇති බවත්, බොහෝ අසත්‍යතාවන්ගෙන් සහ මූණිච්චාවෙන් අපව ගලවා ගන්නා බවත් අපට පෙනී යනු ඇත. යේසුස් වහන්සේ කළ දේම තමන් කරන බව මවාපාන කිතුනුවන් තුළ බොහෝ මූණිච්චාව තිබේ.

"යේසුස් වහන්සේ අවසාන රාත්‍රී භෝජනයෙන් පසු, 'සැබවින්ම, සැබවින්ම මම ඔබට කියමි, මා කෙරෙහි විශ්වාස කරන්නා, මා කරන ක්‍රියාද කරන්නේය; මම පියාණන් වහන්සේ වෙතට යන බැවින්, මේවාට වඩා විශාල ක්‍රියා ඔහු කරන්නේය. ශුද්ධාත්මයාණන් එවන ලෙස මම පියාණන් වහන්සේගෙන් ඉල්ලා සිටිමි' (යොහන් 14:12,16)" යනුවෙන් පැවසූ විට එහි තේරුම කුමක්ද කියා මිනිසුන් සමහරවිට අසනවා. ශුද්ධාත්මයාණන් පැමිණෙන විට, උන්වහන්සේ කළ ක්‍රියා සහ ඒවාට වඩා විශාල ක්‍රියා ඔබට කළ හැකි වනු ඇත. අප එය තේරුම් ගත යුතුය.

යේසුස් වහන්සේ කළ ක්‍රියා මොනවාදැයි ඔබ යමෙකුගෙන් ඇසුවොත්, ඔවුන් වහාම රෝගීන් සුව කිරීම, මළවුන් නැඟිටුවීම, වතුර මත ඇවිදීම, පාන් ගෙඩි පහකින් 5000 කට පෝෂණය කිරීම ගැන කතා කරනු ඇත. නමුත් ඔබ කතා කරන්නේ යේසුස්ගේ ජීවිතයේ අවසාන 10% ගැන පමණයි! උන්වහන්සේගේ ජීවිතයේ අවසාන වසර තුනහමාරක් තුළ උන්වහන්සේ කළේ මෙයයි. උන්වහන්සේ කළේ එපමණක්ද? උන්වහන්සේගේ ජීවිතයේ අනෙක් 90% ගැන කුමක් කිව හැකිද? උන්වහන්සේගේ ජීවිතයේ එම 90% තුළ උන්වහන්සේ කළේ කුමක්ද? උන්වහන්සේගේ මුළු ජීවිත කාලය පුරාම උන්වහන්සේ කළේ කුමක්ද? එක් වාක්‍යයකින්: උන්වහන්සේ තම පියාණන්ගේ කැමැත්ත කළේය. යොහන් 6:38 හි යේසුස් වහන්සේම මෙසේ පැවසීය, "මම ස්වර්ගයෙන් ආවේ මළවුන් නැඟිටුවීමට, රෝගීන් සුව කිරීමට සහ ජලය මත ඇවිදීමට නොවේ. මම ස්වර්ගයෙන් පැමිණියේ මගේම කැමැත්ත ප්‍රතික්ෂේප කිරීමට සහ මගේ පියාණන්ගේ කැමැත්ත කිරීමටයි."

කෙටියෙන් කිවහොත් එය "යේසුස් වහන්සේගේ ක්‍රියා" වේ. උන්වහන්සේ ස්වකීය කැමැත්තට "එපා" කීමට සහ තම පියාණන්ගේ කැමැත්ත කිරීමට පැමිණි සේක. උන්වහන්සේගේ පියාණන්ගේ කැමැත්තට කන්ද උඩ දේශනාව දේශනා කිරීම, අසනීප වූ සියල්ලන් සුව කිරීම, සමහර විට බෙතෙස්ඩා පොකුණෙහි මෙන් එක් අයෙකු පමණක් සුව කිරීම, ජලය මත ඇවිදීම, පේත්‍රැස් වතුර මත ඇවිදීමට සැලැස්වීම සහ රොටි පහකින් 5,000 දෙනා පෝෂණය කිරීම ඇතුළත් විය. පාවුල් සඳහා පියාණන්ගේ කැමැත්තට වතුර මත ඇවිදීම හෝ රොටි 5 කින් 5,000 දෙනෙකු පෝෂණය කිරීම හෝ ලාසරුස් මෙන් දින හතරක් මිය ගොස් සිටි කෙනෙකුව නැඟිටුවීම ඇතුළත් නොවීය, නමුත් එයට පියාණන්ගේ කැමැත්ත ඉටු කිරීම ඇතුළත් විය.

කාරණය එයයි. යේසුස් වහන්සේ කළ ක්‍රියා, එක වාක්‍යයකින්, දෙවියන් වහන්සේගේ කැමැත්ත කිරීමයි. පාවුලුත් ඒක කළා. ඔහුට දෙවියන් වහන්සේගේ කැමැත්ත වූයේ සංචාරය කිරීම, සභා පිහිටුවීම සහ ශුද්ධ ලියවිල්ල ලිවීමයි. යේසුස් වහන්සේ කිසි විටෙකත් ශුද්ධ ලියවිල්ලක් ලිව්වේ නැත, නමුත් පාවුල් එසේ කළේය. අපව ශුද්ධ ලියවිල්ල ලිවීමට කැඳවනු නොලැබේ. නමුත් අපගේ පියාණන්ගේ කැමැත්ත කිරීමට අපව කැඳවනු ලැබේ. යේසුස් වහන්සේගේ ක්‍රියා ඒවාය. මෙයට නිවසේදී යෝසෙප් සහ මරියාට කීකරු වීම ඇතුළත් විය. මරියා ළිඳෙන් වතුර බාල්දියක් ගෙන එන ලෙස ඔහුගෙන් ඉල්ලා සිටියේ නම්, යේසුස් වහන්සේ පිරුණු වතුර බාල්දියක් ගෙන එනු ඇත. ඒවා යේසුස්ගේ ක්‍රියාය: කුඩා දේවලදී සහ විශාල දේවලදී පියාට කීකරු වීම. අප සැමට එය කළ හැකිය.

සවන් දීමට.

©Zac Poonen – [email protected]