එබැවින් මාගේ පුත්‍රයෙනි, මට ඇහුම්කන්දෙන්න. මක්නිසාද මාගේ මාර්ග රක්ෂාකරන්නෝ ආශීර්වාදලද්දෝය. උපදෙස් අසා ප්‍රඥාවන්තවෙන්න, එය ප්‍රතික්ෂේප නොකරන්න. මට ඇහුම්කන්දෙන්නාවූ, දවස්පතා මාගේ දොරටු ළඟ රැකසිටින්නාවූ, මාගේ දොරකඩ කණුවල බලාසිටින්නාවූ මනුෂ්‍යයා ආශීර්වාදලද්දෙකි... (හිතෝපදේශ 8:32-34) දෙවියන්වහන්සේගේ වචනයෙහි 'ආශීර්වාදලද්දෝ' යන වචනයේ තේරුම සැමවිටම 'සන්තෝෂවත්' යන්නයි. ප්‍රඥාවට නිශ්චිත නීති ඇත, ඔබ එම නීති පිළිපදින්නේ නම් ඔබ සැබවින්ම සන්තෝෂවත් වනු ඇත. "දවස්පතා රැකසිටින්නාවූ" කියා මෙම කොටසේ පවසන්නේ මන්ද? මක්නිසාද මට දෙවියන්වහන්සේගේ මුළු ප්‍රඥාවම එකවර එක ගොඩට ලබාගත නොහැකි බැවිනි. අපට එය ලබාගත හැක්කේ දිනපතා පමණි. යේසුස්වහන්සේ (මතෙව් 6:34) හි පැවසුවේ, ඒ ඒ දවසට ඒ ඒ දවසේ කරදරය සෑහෙයි කියාය. සෑම දිනකම අපට මිනිසුන්ගෙන්, අපගේ තත්වයන්ගෙන්, යක්ෂයාගෙන් සහ අපගේ මාංසයේ තෘෂ්ණාවන්ගෙන් නියමිත නපුරේ ප්‍රමාණයකට මුහුණ දීමට සිදුවේ. මට ප්‍රඥාව ලබාගැනීමට අවශ්‍ය නම්, මට දිනපතා කුරුසිය උසුලාගත යුතුය. යේසුස්වහන්සේ පැවසුවේ, "ඔහු තමාවම ප්‍රතික්‍ෂේපකර, දවස්පතා තමාගේ කුරුසිය උසුලාගෙන" මා අනුව ඒවයි කියාය; එසේ කරන්නේ මාගේ දෛනික නපුරේ කොටස (සෙසු මනුෂ්‍ය වර්ගයා මෙන් මා දූෂණය කර අපවිත්‍ර කරනවා වෙනුවට) ප්‍රඥාව බවට හැරවෙන පිණිසය.

දියමන්ති සෑදී ඇත්තේ අඟුරුවලින් බව ඔබ දන්නවාද? එහි අඩංගු වන්නේ අඟුරු වල ඇති මූලද්‍රව්‍යමය. එය සියවස් ගණනාවක් පුරා පොළොවේ පීඩනයට ලක් වූ කාබන් වේ. අඟුරු සෑදෙන ද්‍රව්‍යයෙන්ම දියමන්තියක්ද සෑදේ. එහි ඇත්තේ එම කළු, කැත අඟුරු ඉතා අගනා වටිනා දෙයක් බවට පරිවර්තනය කිරීම පිළිබඳ කාරණයකි. එහි ඇති උපමාව නම්, මා දිනපතා කුරුසිය උසුලාගන්නේ නම්, මාගේ දෛනික නපුරේ කොටස දෙවියන්වහන්සේගේ ප්‍රඥාව සහ මහිමය බවට පත් කළ හැකි බවයි. ප්‍රඥාව එකවර එක ගොඩට ඔබට ලබා දිය නොහැකි බැවින්, ප්‍රඥාවේ දොරටු අසල දිනපතා අසන සහ බලා සිටින මනුෂ්‍යයා සන්තෝෂමත්ය. (එපීස 5:15-16) හි ප්‍රඥාව ගැන මෙසේ පවසයි: "එබැවින් අඥානයන් මෙන් නොව ඥානවන්තයන් මෙන් ප්‍රවේසමෙන් හැසිරෙන්ට බලාගන්න; දවස් නපුරු බැවින් කාලය සම්පූර්ණයෙන්ම ප්‍රයෝජන ගන්න." මෙහි පවසන්නේ එයයි - සෑම දවසක්ම නපුරුය. එබැවින්, සෑම දිනකම ඔබට ලැබෙන මෙම කොටසින් උපරිම ප්‍රයෝජන ගන්න. මැරෙන්නට ලැබෙන එක අවස්ථාවක්වත් මගහැර නොගන්න. ඔබ එකක් මගහැරියහොත්, ඔබට දෙවියන්වහන්සේගේ මහිමයෙන් යමක් අහිමි වේ. ඔබේ මාර්ගයට පැමිණෙන කොටස භාරගන්න, මන්ද එය දෙවියන්වහන්සේ විසින් නියම කර ඇත. උන්වහන්සේ එය හදිසියේ නියම කළේ නැත. අද ඔබට මුහුණ දීමට සිදු වූ නපුරේ කොටස ඔබට පුදුමයක් වුවද, එය දෙවියන්වහන්සේට පුදුමයක් නොවීය. අපට ප්‍රඥාව ලබාගැනීමට හැකිවන පිණිස අප ඉපදීමට පෙර සිටම අපට නියම කරන ලද කොටස එයයි.

කුරුසියේ මාර්ගය තේරුම් නොගන්නා බැවින් ප්‍රඥාව ලබාගන්නේ කෙසේදැයි තේරුම් ගන්නේ ඉතා සුළු පිරිසකි. "මට ඇහුම්කන්දෙන්නාවූ, දවස්පතා මාගේ දොරටු ළඟ රැකසිටින්නාවූ, මාගේ දොරකඩ කණුවල බලාසිටින්නාවූ මනුෂ්‍යයා ආශීර්වාදලද්දෙකි (සන්තෝෂමත්ය)." එය හරියට කළමනාකාර අධ්‍යක්ෂකවරයාගේ කාමරයේ දොරෙන් පිටත වාඩි වී, යමක් අසන්නට බලා සිටින ආධුනිකයෙකු මෙනි. සෑම දිනකම ප්‍රඥාව බලාපොරොත්තුවෙන් එසේ සිටින්න. දවස පුරාම අපගේ ආකල්පය විය යුත්තේ මෙයයි: "ස්වාමීනි, අද මට ප්‍රඥාව දුන මැනව. එපමණයි. දුක් විඳීමෙන් මාව නිදහස් කරන්නැයි මම ඔබෙන් ඉල්ලන්නේ නැත. ජීවිතයේ පහසු මාවතක් මට දෙන්නැයි මම ඔබෙන් ඉල්ලන්නේ නැත. ස්වාමීනි, මට ප්‍රඥාව දුන මැනව. අද මා වෙනුවෙන් ඔබ අරමුණු කර ඇති සැලැස්ම ඉටු කිරීමට මට උපකාර කළ මැනව."

දෙවියන්වහන්සේ ඔබට ආශීර්වාද කර ඇති බව ඔබ දන්නේ කෙසේද? හිතෝපදේශ 8:35 ට අනුව, ඒ ඔබ දෙවියන්වහන්සේගේ ප්‍රඥාව ලබාගත් විටය. එය ඔබට උසස්වීමක් හෝ වඩා හොඳ රැකියාවක් හෝ මේ පොළොවේ කිසිවක් ලැබුණු විට නොවේ. නැත. ඒ ඔබට ප්‍රඥාව ලැබුණු විටය. එවිට ඔබට ස්වාමීන්වහන්සේගෙන් කරුණාව ලැබී තිබේ. ප්‍රඥාවේ ගුණාංග වන දෙවියන්වහන්සේගේ ඉවසිලිවන්තකම, පවිත්‍රකම, සමාදානය සහ යටත් වීමට ඇති කැමැත්ත ඔබ ලබාගත් විටය (යාකොබ් 3:17) .

හිතෝපදේශ 8:36 හි අග්රයේ සටහනේ මෙසේ සඳහන් වේ: "මා අහිමි කරගන්නා තමාටම හානි කරගන්නේය." එයින් අදහස් කරන්නේ ඔබ ජීවත් වෙමින් ප්‍රඥාව ලබාගැනීම මගහැරියහොත්, අපට කුමක් තිබුණත් - බයිබල් දැනුම පවා තිබුණත් - අප අපගේ ජීවිතය සැබවින්ම නාස්ති කරගත් බවයි. අපට උසස් රැකියාවක් ලැබී තිබෙන්නට පුළුවන, නැතහොත් යම් සභාවක ගෞරවනීය සාමාජිකයන් වන්නට පුළුවන, නමුත් අපගේ මෙලොව ගමනේදී දෙවියන්වහන්සේගේ ප්‍රඥාවට පංගුකාරයන් වීම අපට මගහැරුණේ නම් ජීවිතයේ ප්‍රධානම දෙය අපට මගහැරී ඇත. දෙවියන්වහන්සේ මා ලබාගන්නා පිණිස නියම කර තිබූ එක් දිනක ප්‍රඥාවේ කොටස මට මගහැරුණේ නම්, මට එය සදාකාලයටම අහිමි වී ඇත. මට එය නැවත කිසිදා ලබාගත නොහැක. ඊයේ දවසේ මා පංගුකාරයෙකු වන පිණිස දෙවියන්වහන්සේට අවශ්‍ය වූ ප්‍රඥාව මට නැවත ලබාගත නොහැක. එය ගෙවී ගොස් අවසන්ය. සෑම දිනකම මා යම් ප්‍රඥා ප්‍රමාණයක් ලබාගත යුතු බව දෙවියන්වහන්සේ නියම කර ඇත, මම එය ලබා නොගන්නේ නම්, මට එය මගහැරී ගොස් ඇත. මුළු සදාකාලයටම මට එය මගහැරී ඇත. මට අද දවසේ කොටස ලබාගත හැක, හෙට දවසේ කොටසද ලබාගත හැක, නමුත් මට ඊයේ දවසේ කොටස ලබාගත නොහැක. දෙවියන්වහන්සේට වුවද එය මට ආපසු දිය නොහැක. දවස් නපුරු බැවින් අප කාලය සම්පූර්ණයෙන්ම ප්‍රයෝජන ගත යුතු යැයි පවසන්නේ එබැවිනි. සෑම දවසකම එම නපුර ප්‍රඥාව බවට පරිවර්තනය කරගන්නට මම ඉගෙන ගනිමි.

සවන් දීමට.