ඔබේ ජනප්‍රියත්වය අනුව කිසි විටෙකත් ඔබේ ශ්‍රමයේ සාර්ථකත්වය මනින්න එපා. යේසුස් වහන්සේ ජනතාව අතර "ජනප්‍රිය" වූ සියල්ලන්ට දුක්වේ යැයි ප්‍රකාශ කළසේක, මන්ද එය බොරු අනාගතවක්තෘවරයෙකුගේ හඳුනාගැනීමේ ලකුණ වූ බැවිනි (ලූක් 6:26). එබැවින් ඔබ ඉතා ජනප්‍රිය දේශකයෙක් නම් ඔබ බොරු අනාගතවක්තෘවරයෙකු විය හැකිය! අනෙක් අතට, යේසුස් වහන්සේ තම ගෝලයන්ට පැවසුවේ, සෑම කෙනෙකුම ඔවුන්ට විරුද්ධව කතා කරන විට ප්‍රීති වන ලෙසයි, මන්ද එය සැබෑ අනාගතවක්තෘවරයෙකුගේ ලකුණකි (ලූක් 6:22, 23).

යේසුස්වහන්සේ මෙහි පැවසූ දේ ඔබ සැබැවින්ම විශ්වාස කරනවාද?

ඊශ්‍රායෙල් ඉතිහාසයේ සහ සභා ඉතිහාසයේ සෑම සැබෑ අනාගතවක්තෘවරයෙකුම ඔහුගේ කාලයේ සිටි ආගමික නායකයන් විසින් දඩයම් කිරීමට සහ වෛර කිරීමට සහ බොරු චෝදනාවලට ලක්කළ මතභේදාත්මක චරිතයක් බව මතක තබා ගන්න.

මෙම රීතියට වෙනස් වූ එකදු කෙනෙකු වත් නොමැත - එය පැරණි ගිවිසුමේ කාලයේ එලියා සහ යෙරමියා වේවා, හෝ පළමු සියවසේ යොහාන් බෞතිස්ථ සහ පාවුළු වේවා, හෝ නූතන කාලයේ ජෝන් වෙස්ලි සහ වොච්මන් නී වේවා!

එබැවින් අප කෙතරම් ජනප්‍රියද යන්නෙන් අපගේ ශ්‍රමයේ සදාකාලික සාර්ථකත්වය කිසිවිටෙකත් මැනිය යුතු නැත!

සංඛ්‍යාලේඛන මගින් අපගේ ශ්‍රමයේ සාර්ථකත්වය මැනිය යුතු නැත - අපගේ රැස්වීම් වලදී කී දෙනෙක් අත් ඔසවනවාද යන්න හෝ අප කී දෙනෙකුට දේශනා කළාද ආදී වශයෙන්.

සංඛ්‍යාලේඛනවලට අනුව බලන්නේ නම්, යේසුස්වහන්සේගේ දේවසේවය මුළුමනින්ම අසාර්ථක වූ එකක් බව අපට පැවසීමට සිදුවනු ඇත, මන්ද උන්වහන්සේගේ දේවසේවය අවසානයේ උන්වහන්සේට තම පියාණන්ට ඉදිරිපත් කිරීමට සිටියේ මිනිසුන් 11 දෙනෙකු පමණි (යොහන් 17). නමුත් උන්වහන්සේගේ දේවසේවයේ සාර්ථකත්වය දැකගත හැකි වූයේ එම ගෝලයන් එකොළොස් දෙනා මොන විදිහේ මිනිසුන් වූවේද යන්නෙනි! ඔවුන් අද සිටින අඩ හදවත් ඇති, මුදලට ලැදි, සම්මුතිවාදී, ලෞකික "ඇදහිලිවන්තයන්" මිලියන එකොළහකට වඩා දෙවියන් වහන්සේට බොහෝ සෙයින් වටින, සහ දෙවියන් වහන්සේ වෙනුවෙන් බොහෝ දේ ඉටු කළ හැකි අය වූවෝය.

ඒ මුල්ම අපෝස්තුළුවරුන්ගේ මට්ටමේ පුද්ගලයන් එකොළොස් දෙනෙක් මගේ මුළු ජීවිත කාලය තුළම බිහි කළ හැකි නම්, මගේ දේවසේවයේ විශිෂ්ට සාර්ථකත්වයක් ලැබෙනු ඇතැයි මට හැඟී ඇත. ඒත් එහෙම දෙතුන් දෙනෙක්වත් බිහි කරන එක පහසු නොවේ. "යේසුස් වහන්සේව විශ්වාස කරන" නමුත් මුළු හදවතින්ම උන් වහන්සේට ප්‍රේම නොකරන ලෞකික සම්මුතිවාදීන් සමූහයක් එක්රැස් කිරීම වඩා පහසුය.

පසුගිය ශතවර්ෂ 20 තුළ දෙවියන් වහන්සේ ක්‍රිස්තියානි ලෝකයේ ආරම්භ කළ සෑම ව්‍යාපාරයකම, එය දෙවන පරම්පරාවට ඇතුළු වන විට පරිහානියට පත් වූ අතර එය එහි නිර්මාතෘ විසින් ආරම්භ කරන ලද ප්‍රබෝධමත්, ජ්වලිත වූ ව්‍යාපාරයක් ලෙස තවදුරටත් පැවතුනේ නැත. ඇයි?

එක් හේතුවක් වූයේ දෙවන පරම්පරාව සංඛ්‍යාවෙන් වැඩි වීම ගැන සැලකීමයි. ඔවුන්ගේ සංඛ්‍යාව වැඩි වීම දෙවියන් වහන්සේ ඔවුන්ට ආශීර්වාද කරන බවට සාක්ෂියක් බව ඔවුහු සිතූහ.

නමුත් මෑත වසරවල ලෝකයේ වේගයෙන්ම වර්ධනය වන කණ්ඩායම් වන්නේ වෙනත් ආගම්වල ලබ්ධීන් සහ මූලධර්මවාදී කණ්ඩායම් ය. එයින් ඔප්පු වන්නේ කුමක්ද? මෙය පමණකි - සංඛ්‍යාත්මක වර්ධනය දෙවියන් වහන්සේගේ ආශීර්වාදය පිළිබඳ සාක්ෂියක් නොවේ යන්නයි.

දෙවියන් වහන්සේ අපට ක්‍රිස්තුස් වහන්සේගේ ශරීරය තුළ දී ඇති දේවසේවය කෙරෙහි අවධානය යොමු කරන ලෙසත් ඒ සමඟම විවිධ සේවාවන් ඇති අන් අය සමඟ සහයෝගයෙන් කටයුතු කිරීමටත් අපට ආරාධනා කරන සේක. අපගේ දේවසේවයේ ප්‍රතිඵල නිවැරදිව තක්සේරු කළ නොහැක, මන්ද අප ක්‍රිස්තුස් වහන්සේගේ ශරීරය නිරූපණය කරන කණ්ඩායමක කොටසක් වන බැවිනි.

අප සහතික කර ගත යුත්තේ දෙවියන් වහන්සේ අපට ඉටු කිරීමට දී ඇති කාර්යයට අප විශ්වාසවන්තව සිටිනවාද යන්නයි.

©Zac Poonen – [email protected]